拜年問答

兔年將至，又到拜年時。中國人永遠不明白，有血緣關係的人，不一定投緣。平日連問候都懶的親人，被迫共處一室，還要互相祝福，同時進食大量高熱量傳統食品，其實是非常痛苦的事。

小孩子和年輕人都怕拜年，因為那些年過半百、本身事業愛情都一塌糊塗的長輩，最喜歡用關懷做藉口，質問晚輩為何尚未買樓、結婚、生仔、嫁入豪門、發達上岸，諸如此類。為免破壞節日氣氛以及維持表面上的和諧，以下提供一堆標準答案，任君選擇，歡迎抄橋，祝大家一團和氣。

陳志雲官腔版

我好高興你提出呢個咁重要嘅問題，我正在非常嚴肅、認真咁處理，不過好對唔住，由於進入左有關嘅程序，暫時我唔可以提供太多嘅資料俾你。但係，係呢一刻，我好樂意咁話俾你聽，我暫時唔會採取任何過激嘅行動，請你十萬個放心，同時多謝你嘅關愛，同埋親切嘅慰問。祝你身體健康，心想事成。

我好明白大家嘅關注，但係我唔方便講呢個問題。不如我哋換個話題丫，人生其實有好多嘢，值得我哋去追求或者關心，例如：（下接任何與個人無關的話題，可以是環保、科學論文、冷知識，請盡量延長，務求令對方主動放棄閣下）。

娛樂名人版

好多謝大家嘅關心，ＸＸＸ（閣下的名字）向來唔講私人嘢。

呢啲嘢唔係你想有就有，都係隨緣啦，我相信上天自有安排。

我哋尊重番個場合啦，好唔好？今日都係講兔年運程適合啲，你邊個生肖架？

謀財害命家變版

乜家身家乜家分（乜 ＝ 閣下姓氏），關你乜事啫？恭喜發財，係咁啦（轉身走）。

人哋啲嘢你問番人哋啦，總之我無回應。祝大家身體健康，係咁啦（轉身走）。

關於乜家嘅嘢，唔使問我，我唔知。總之以和為貴，家和萬事興（轉身走）。

宗教信徒回頭是岸版

係呢一刻我已經擁有好多，我好感恩，我會將呢啲嘢交托俾神。你信左耶穌未？

世事無常，錢財乃身外物，我哋要活在當下。阿彌陀佛，有無興趣聽我講佛偈？

位高勢危，亢龍有悔，此乃乾卦。要掌握事物變化嘅規律，就由文王八八六十四卦開始講起．．．．．．。

八十後九十後專用

．．．．．．（低頭不語，繼續玩 iPhone 或者 iPad ）。

插畫來源：
http://img685.ph.126.net/SdfjYzVvpiqThr4HSxlnuA==/2802646343109302025.jpg

參考資料：

How to Handle Questions You Don't Want to Answer
http://www.bnet.com/blog/pr/how-to-handle-questions-you-dont-want-to-answer/260

29/01/2011

回覆 Mr.aa：Auntie 是香港人，學過普通話，識漢語拼音。